Behaviors & Attitudes, Social, Uncategorized, حسن معاشرت

Whatsapp Bombardment

واٹس ایپ بمباری

۔  دیکھئے! یہ جو واٹس ایپ ہے ناں… یہ پیغام رسانی کا ایک بہت اچھا اور نافع ذریعہ ہے… لیکن اس کا استعمال ایسے کرنا چاہیے کہ موصول کنندہ آپ کے بے وقت پیغامات سے عاجز نہ آ جائے…

 

۔  دیکھئے! “صبح بخیر” کا ایک میسج ایک صبح کے لیے پوری کفایت کر دیتا ہے… سو صبح بخیر کے میسیجز کی دس بیس گولیاں چلانے کی چنداں ضرورت نہیں… وہ بھی صبح صادق کے وقت۔۔۔

 

۔  دیکھئے! جمعہ کی مبارکباد دینا شریعت سے ثابت نہیں… تاہم اگر آپ پھر بھی مبارکباد دینے پر مصر ہیں تو فی جمعہ ایک میسج کافی ہے… کیا ضرورت ہے جمعہ کے دن مبارکبادوں کا پورا برسٹ مارنے کی۔۔۔

 

۔  دیکھئے! اگر کسی وجہ سے آپ کو رات بھر نیند نہیں آتی… یا اللہ کے فضل و کرم سے آپ منہ اندھیرے تہجد کے لیے جاگ جاتے ہیں… تو اس کا یہ مطلب نہیں کہ باقی دنیا بھی آپ کے ساتھ ساتھ جاگ جاتی ہے یا دنیا کو آپ کے ساتھ ساتھ جاگ جانا چاہئے… نہ ہی یہ مطلوب ہے کہ واٹس ایپ کو کلاشنکوف کی طرح استعمال کر کے سارے عالم کو تہجد کے لیے جگایا جائے… جن کو تہجد یا فجر کی نماز کی فکر ہوتی ہے وہ اپنے جاگنے کا خود اہتمام کر لیتے ہیں… موبائل فون میں الارم بھی ہوتا ہے ناں؟

۔  دیکھئے! احادیث کی کتابوں میں یہ روایت ملتی ہے کہ رسول اللہ صلی اللہ علیہ وسلم جب تہجد کیلئے بیدار ہوتے تو بستر سے آہستہ اٹھتے اور نہایت آہستہ سے دروازہ کھولتے تھے ایسا اس لئے کرتے کہ اماں عائشہ صدیقہ رضی اللہ عنہا کی نیند میں خلل نہ آئے،

(مسلم:۲/۳۱۳)

 

دیکھئے! اللہ کے رسول صلی اللہ علیہ وسلم اپنی زوجہ مطہرہ کے آرام کا کس درجہ خیال رکھ رہے ہیں جو کہ اسی حجرہ مبارک بلکہ اسی بستر مبارک میں محو استراحت ہیں… اور آپ… اپنے سے میلوں دور بیٹھے احباب پر واٹس ایپ کی بمباری کر رہے ہوتے ہیں… آپ کو کچھ خبر بھی ہے کون کس وقت سویا رات کو۔۔۔

 

دیکھئے! یہ جو موبائل فون ہے ناں… یہ آپس کے رابطوں کا بہترین ذریعہ ہے… اور اکثر لوگ اپنا موبائل فون چوبیس گھنٹے آن رکھتے ہیں… اب آپ کی میسج بمباری کے باعث نیند خراب ہونے کے خوف سے کوئی اپنا فون رات سوتے وقت آف یا سائلنٹ کر لیتا ہے… اور صبح کو اسے پتہ چلتا ہے کہ رات انتہائی ایمرجنسی میں کسی نے اسے کال کی… لیکن موبائل آف یا سائلنٹ ہونے کے سبب وہ کال ریسیو نہیں کر سکا… بروقت مدد کو نہیں پہنچ سکا… تو اس کا ذمہ دار کون ہو گا۔۔۔ 
آپ… صرف آپ۔۔۔

 

کچھ تو خیال کیجیے محترم۔۔۔

Advertisements
Behaviors & Attitudes, Emaan, Eman, Islam, Love your Creator... اللہ سے محبت کیجئے, Pakistan, اسلام

B L E S S E D – F R I D A Y

بلیسڈ فرائیڈے

وجہ چاہے عالمگیریت ہو یا مرعوبیت ، روشن خیالی ہو یا میڈیا کی ڈھٹائی، غیر اسلامی معاشروں کا گند غلاظت رفتہ رفتہ اسلامی معاشرت کو آلودہ کرتا جا رہا ہے۔ صحیح غلط کی پہچان مٹتی جا رہی ہے۔ کفار ہم سے کچھ سیکھیں نہ سیکھیں، ہم ان سے بہت کچھ امپورٹ کر رہے ہیں۔
پہلے ویلنٹائن ڈے جیسا فحش اور قبیح تہوار مسلم ممالک میں داخل ہوا اور اب بلیک فرائیڈے کا ڈنکا بج رہا ہےیا بجایا جا رہا ہے۔ مختلف اداروں کی جانب سے بھرپور رعایتی سیل کے اعلانات ہو رہے ہیں۔ ویب سائٹس ، ایس ایم اسی مارکیٹنگ اور سوشل میڈیا کے ذریعے خوب تشہیر کی جا رہی ہے۔ معروف پاکستانی آن لائن اسٹور دراز ڈاٹ پی کے نے اس موقع پر قیمتوں میں ۸۶ فیصد تک رعایت کا اعلان کیا ہے۔ اس رعایتی سیل کی تشہیر کے لئے لگائے گئے بینرز پوسٹرز شہر میں مختلف مقامات پر دیکھے جا سکتے ہیں ۔ اسی طرح معروف کورئیر سروس ٹی سی ایس کے آن لائن اسٹور یہ وہ ڈاٹ کام نے بھی اس موقع پر ۸۰ فیصد تک رعایت کا اعلان کیا ہے۔

جمعہ شعائر اسلام میں سے ہے۔ مسلمانوں کے لئے یہ بڑا اہم اور فضیلت والا دن ہے ۔ اس کی شان میں رسول اللہ ﷺ کی متعدد احادیث مبارکہ بھی روایت ہوئی ہیں۔ سید الانبیاء ﷺ نے جمعہ کو سید الایام کہا یعنی ہفتہ کے دنوں کا سردار ۔ اسی طرح ایک حدیث مبارکہ کا مفہوم ہے کہ سورج کے طلوع و غروب والے دنوں میں کوئی بھی دن جمعہ کے دن سے افضل نہیں۔ اسلام کے متوالوں کے لئے یہ رحمتوں اور برکتوں والا دن ہے، ایک روشن اور منور دن ہے۔

لیکن ایک مخصوص ایجنڈے کے تحت اس دن کوسیاہ دن کا نام دیا جا رہا ہے اور اب اس کی اس قدر منظم انداز میں تشہیر کی جا رہی ہے کہ مسلمانوں کی زبانوں پر بھی یہی الفاظ چڑھتے جا رہے ہیں۔ عالم اسلام کو اس قسم کی چالبازیوں سے ہوشیار اور چوکنا رہنے کی ضرورت ہے۔ ہم کفار کو تو نہیں روک سکتے البتہ ان کی تقلید سے بچنا بہرحال ضروری ہے۔

ہم ان سطور کے ذریعے پاکستان کے تمام اسٹورز اور برانڈز کو متنبہ کرتے ہیں کہ خدارا اسلامی شعائر کی اہانت سے باز رہئے۔ کیا ضروری ہے کہ مسلمان بھی اسی دن سیل کے اعلانات کرتے پھریں ؟ اسلام نے عید الفطر اور عید الاضحیٰ کے دو تہوار دے رکھے ہیں۔ اگر سیل لگانی ہے تو ان مواقع پر لگائیے تاکہ آپ کے دینی بھائیوں کو فائدہ ہو۔ اور آخری بات یہ کہ اگر آپ نے اسی دن سیل لگانی ہے تو کم از کم اس مکروہ نام سے تو نہ لگائیے ، کیوں نہ ایک نیا نام متعارف کرا دیا جائے۔۔۔ بلیسڈ فرائیڈے یا برائٹ فرائیڈے۔۔۔
#Blessed_Friday
#Bright_Friday