زن مرید
پہلی مرتبہ وہ مجھے جمرات پر نظر آئے۔ مناسب قد و قامت کے حامل تھے۔ چہرے پہ سجی سفید داڑھی نہایت بھلی معلوم ہو رہی تھی۔ شخصیت میں کچھ اس بلا کی کشش تھی کہ بندہ دیکھتا ہی چلا جائے۔ بڑے جذبے سے کنکریاں مار رہے تھے۔ ساتھ ساتھ ہچکیوں سے روتے بھی جا رہے تھے۔
سات کنکریاں مار چکے تو پھر سات اور ماریں۔ خیال ہوا کہ شاید کسی اور نے اپنی رمی کرنے کے لئے وکیل بنایا ہو گا۔
پھر قربان گاہ میں بھی انہیں دیکھا تو وہاں بھی یکے بعد دیگرے دو دنبے ذبح کئے۔ ظاہر ہے قربانی کے لئے بھی بہت سے لوگ ذمہ داری لے لیتے ہیں، سو اس میں بھی کوئی غیر معمولی بات نہ لگی۔
اگلے روز طواف زیارت کے لئے حرم پہنچا تو طواف کے آغاز پر وہ پھر نظر آئے۔ میں طواف شروع کر رہا تھا اور وہ طواف مکمل کر کے ہجوم سے باہر نکل رہے تھے۔ لیکن کچھ ہی دیر بعد پھر انہیں دوبارہ طواف کرتے ہوئے پایا۔ سخت تعجب ہوا کہ اس قدر ہجوم میں ایک ہی طواف کرنا مشکل ہو رہا تھا اور یہ حضرت دوسرا طواف کرنے لگ گئے۔
بعد ازاں صفا مروہ کی سعی کے دوران پھر ان پر نگاہ پڑی ۔ مروہ پر سعی مکمل کر کے میں چپل اٹھانے کی غرض سے صفا پر پہنچا تو انہیں ایک بار پھر سعی کی نیت کرتے اور پھر صفا سے مروہ کی جانب چلتے دیکھا۔
اب تو سخت حیرت ہوئی کہ حضرت ہر عمل دو دو بار کر رہے ہیں۔ خیال ہوا کہ پوچھنا چاہئے لیکن اس قدر ہجوم میں کہاں موقع تھا ان باتوں کا۔ سو اپنی راہ لی۔ لیکن ایک کھٹک سی دل میں برقرار رہی۔
حج کے بعد ایک روز میں ناشتے کا سامان لینے کی غرض سے بقالے کی جانب جا رہا تھا کہ وہ گلی میں داخل ہوتے نظر آئے۔ سلام دعا کے بعد پتہ چلا کہ قریبی عمارت میں ہی رہائش پزیر ہیں۔
کچھ دیر رسمی باتوں کے بعد میں نے کہا کہ آپ کو حج کے دوران جا بجا دیکھا۔ آپ سے کچھ باتیں دریافت کرنا چاہتا ہوں۔ کہنے لگے : چلئے میاں! ہمارے کمرے میں آ جائیے۔ ناشتہ ساتھ ہی کرتے ہیں۔
چنانچہ ان کے کمرے میں جا پہنچا۔ کمرے میں دو بستر پڑے تھے۔ اور باقی سامان سلیقے سے رکھا ہوا تھا۔ ناشتے کے دوران کچھ ادھر ادھر کی باتیں ہوتی رہیں۔ پھر انہوں نے کہا: میاں پوچھئے کیا پوچھنا چاہ رہے تھےآپ ؟
عرض کی : حضرت ! حج کے ارکان کی ادائیگی کے دوران آپ مجھے جا بجا نظر آئے۔ آپ کو ہر عمل دو دو بار کرتے دیکھا۔ بس یہی بات کھٹک رہی تھی ۔
سوال سن کر وہ ٹھٹک کر رہ گئے۔ پھر ان کی آنکھوں سے آنسو جاری ہو گئے۔ مجھے سخت افسوس ہوا کہ ناحق ان کو دکھی کر دیا۔
معذرت کرنے لگا ۔
کہنے لگے: نہیں میاں ! معذرت کیسی؟ بتائے دیتے ہیں آپ کو۔ شاید کچھ دل کا بار کم ہو جائے۔
پھر رومال سے آنکھیں پونچھ کے آہستہ آہستہ بتانے لگے:
میاں کیا بتائیں؟ بیگم کو حج کی شدید آرزو تھی۔ چھ ماہ پہلے کی بات ہے جب حج فارم جمع ہونے کی تاریخوں کا اعلان ہوا تو پیچھے لگ گئی کہ اس بار ہم بھی فارم بھر دیں۔
ہم نے کہا کہ بھئی ابھی وقت مناسب نہیں معلوم ہوتا ۔ بچیاں شادی کی عمر کو پہنچ گئی ہیں۔ رقم پس انداز کرنی شروع کر دینی چاہئے۔ آخر کو ان کی شادیاں کرنی ہیں۔
لگی حدیثیں سنانے۔ کہ رسول پاک ﷺ نے فرمایا کہ حج فرض ہو جانے کے بعد حج کی ادائیگی میں جلدی کرنی چاہئے کہ جانے کب کیا رکاوٹ پیش آ جائے۔
پھر دوسری حدیث یہ سنا دی کہ جو حج کی ادائیگی کی قدرت رکھنے کے باوجود حج نہ کرے تو وہ چاہے یہودی ہو کے مرے یا نصرانی۔
پھر تیسری حدیث کہ حج مبرور کا بدلہ جنت کے سوا کچھ نہیں۔
پھر ایک دلیل یہ دی کہ پہلے کوئی کام رکا ہے ہمارا جو آئندہ رکے گا؟ جب جس چیز کی ضرورت پڑی، اللہ نے اپنے فضل سے پوری کر دی۔ آئندہ بھی کر دے گا۔
تو میاں سمجھو یوں حج کا فارم جمع کرا دیا۔ اور پھر یہاں چلے آئے۔
میاں مت پوچھو کہ بیت اللہ پر پہلی نگاہ پڑی تو کیا حالت ہوئی۔ کیسا سرور ملا۔ جھوم کے کہا :بیگم !اس ایک نگاہ میں ہی سارے پیسے وصول ہو گئے۔
عمرہ ادا کیا تو نشاط طاری ہو گیا۔ یہی خیال آتا رہا کہ عمرہ میں اتنی لذت ہے تو حج کیا ہو گا؟ حج کے انتظار کے دنوں میں طواف اور نماز کے لئے بیت اللہ کے چکر لگتے رہے ۔
درمیان میں سرکار ﷺ کے دربار میں حاضری کا موقع بھی ملا۔ روضہ اقدس پہ سلام عرض کرنے کی سعادت ملی۔ احباب و متعلقین کے سلام کی امانت سرکار ﷺ کی خدمت میں پیش کی۔ روز ریاض الجنۃ میں نوافل ادا کئے۔ کئی مرتبہ جنت البقیع میں مدفون صحابہ و اکابر کی قبور پر فاتحہ خوانی اور بلندی درجات کی دعائیں کیں۔ شہدائے احد کی خدمت میں نذرانہ عقیدت پیش کیا۔ مسجد قبا و مسجد قبلتین کی زیارت کی۔ کھجوریں خریدیں۔
دیار نبی ﷺ سے فیض پا کر مکہ لوٹے تو مزید ایک عمرہ کا موقع ملا۔ ہر لمحہ اللہ کی رحمت کا ہالہ اپنے گردا گرد محسوس ہوتا تھا۔ میاں دعائیں تو یوں قبول ہو رہی تھیں گویا رب کعبہ انتظار میں بیٹھا ہو کہ ہمارے منہ سے کوئی سوال نکلے اور وہ پورا کرے۔
اللہ اکبر۔
میاں یقین مانو اسی کا ظرف ہے ورنہ کہاں ہم سا گنہگار کہ حج ایسے فریضے کی ادائیگی کی فکر کرنے کے بجائے ٹال مٹول اور بہانے بازیاں ، اور کہاں اس کا کرم۔ چاہتا تو وہ بھی ہماری دعاؤں کو ٹال دیتا ۔
لیکن نہیں میاں۔۔۔ بلا بھی لیا۔۔۔
اور مان بھی گیا۔
دن یونہی مزے میں گزر رہے تھے۔
حج قریب آتا جا رہا تھا۔
وہ جمعہ کی شام تھی۔
آسمان پر کالے بادل گھر گھر کے آنے لگے ۔
پھر باران رحمت کا نزول ہوا۔
شدید بارش ہوئی۔
ہم اور ہماری بیگم حرم شریف کے بیرونی صحن میں تھے۔ لمحوں میں کپڑے تر بتر ہو گئے ۔ طے ہوا کہ واپس رہائش گاہ پر چلا جائے۔
دو چار قدم چلے تھے کہ ہمیں خیال آیا کہ پانی کے تھرماس میں زم زم ختم ہو چکا ہے۔
بیگم سے ذکر کیا تو جھٹ سے بولی : آپ ٹھہریں ۔ میں بھر کے لاتی ہوں۔ اور پاس ہی موجود زم زم کی ٹنکی کی جانب لپکی۔
ابھی چند قدم ہی آگے بڑھی ہو گی کہ ایک دھماکہ ہوا اور اوپر سے منوں وزنی کرین آ گری۔ اور بیگم۔۔۔
میاں بس مت پوچھو آن کی آن میں کیا ہو گیا۔۔۔
ان کی آواز بیٹھتی چلی گئی۔
میری بھی آنکھوں میں آنسو آ گئے۔ وہ حادثہ تھا ہی اتنا اندوہناک ۔ ایک لمحہ میں بیسیوں حاجی شہید ہو گئے تھے۔ اور بے شمار زخمی۔ حرم کا مرمریں صحن سرخ ہو گیا تھا۔
تعزیت کرنی چاہی لیکن الفاظ گویا حلق میں پھنس کر رہ گئے۔
کچھ دیر سکوت کے بعد انہوں نے ہی خاموشی توڑی:
میاں!
کیا بتاؤں کتنی خوبیاں تھیں اس میں۔
نہایت صابر و شاکر ۔
وفا شعار ۔
سلیقہ مند۔
اللہ کی رضا میں راضی۔
بھاگ بھاگ کے ہماری خدمتیں کیا کرتی تھی۔
ہماری مرضی پہ اپنی مرضی کو قربان کر دیا۔
اپنی پسند نا پسند کو ہماری پسند نا پسند کے مطابق ڈھال لیا۔
ہر خوشی غمی میں ہمارے شانہ بشانہ۔
میاں وہ کہتی تھی کہ عورت کا مرد کے شانہ بشانہ چلنے کا اصل اور پسندیدہ طریقہ یہی ہے۔
میاں ! نکاح میں قبول ہے کہا نا ۔۔۔ تو پھر ہر طرح سے ہمیں قبول کر کے دکھایا۔ ہماری جھڑکیاں اور نخرے برداشت کئے۔ کبھی شکوہ نہ کیا۔ وقت بے وقت کی فرمائشیں پوری کیں۔
سفر حج کے سامان کی پیکنگ کے وقت ہماری ضرورت کی تمام اشیاء خود ہی جمع کر کے رکھیں۔
کپڑوں سے لے کر سیفٹی پن تک۔۔۔
اور عینک سے لے کر دواؤں تک۔۔۔
ہر چیز کی موجودگی کو یقینی بنایا۔
تربیتی نشستوں میں باقاعدگی سے شرکت کا اہتمام کیا۔
اور یہاں آ کے تو وہ گویا بچھی ہی چلی جا رہی تھی۔ہل کے پانی تک نہ پینے دیتی تھی ہمیں۔ حرم میں حاضری کے بعد تھک کر واپس آتے تو خود باوجود تھکان کے ہمارے پیر دبانے لگ جاتی۔
ہم روکتے تو کہتی کہ پہلے تو آپ صرف شوہر تھے، اب تو اللہ کے مہمان بھی ہیں۔ اللہ کے مہمان کی خدمت کرنے دیجئے۔
کبھی کبھی احساس تشکر سے بھیگی آنکھیں لئے ہمارے ہاتھ پکڑ کر کہتی کہ آپ نے مجھے اللہ کا گھر دکھا دیا۔ حالانکہ میاں درحقیقت وہ ہمیں لے کر آئی تھی۔
ہاہ ! وہ صرف ہماری دنیا ہی کے نہیں، آخرت کے بارے میں بھی فکر مند رہا کرتی تھی۔
میاں اللہ والی تھی ۔۔۔
بڑی اللہ والی۔
شاید جبھی اللہ نے اسے پاک صاف کر کے اپنے پاس بلا لیا۔
شہادت کی موت عطا فرما دی۔
سیدہ خدیجہؓ کے قدموں میں جگہ عطا فرما دی۔
کیسے بلند درجات پا لئے۔
بچوں کی بھی ایسی تربیت کی کہ جب بچوں کو اس کی شہادت کی اطلاع دی تو وہ الٹا ہمیں ہی صبر کی تلقین کرنے لگے۔
میاں سچ فرمایا سرکار ﷺ نے کہ دنیا کی بہترین نعمت نیک بیوی ہے۔
اس نیک بخت نے خدمتیں کر کر کے ہمیں اپنا گرویدہ بنا لیا تھا۔
میاں حج پر ہر ہر رکن کی ادائیگی کے دوران اس کی کمی محسوس ہوئی۔۔۔
سو اس کی طرف سے بھی
رمی،
قربانی،
طواف زیارت
اور سعی کر دی ۔۔۔
بس یونہی اپنے دل کے بہلاوے کو۔۔۔
کہ ہم نے قدم قدم پر خود کو اس کی محبتوں اور وفاؤں کا مقروض پایا۔
میاں!ہمارے تمام متعلقین ہمیں زن مرید کہتے ہیں۔
چاہو تو تم بھی کہہ لو!
Join our Facebook Page
https://www.facebook.com/profile.php?id=100010437041297
abushaheer 